Ŋätjil baman' birr yakan nyinan ŋandhark Garkman, ŋarru galki guḻun'miŋa ŋayiŋa.
Ga waŋganymim ḏaykun'thu goḏarrmi nhan Garkman ṉakaman yakurrŋuru nharaŋ, bala nhan gapun watjaran ḻinygu nhan mariminan nharaŋdjin.
Bala nhan gapun wurkthuwan, wurkthuwanan, wurkthuwanan, wurkthuwanan yanan ḻinygu ga dhawaryuman waŋganyŋuru guḻun'ŋuru bayan nhan yakan baṉḏany dhäyan.
Ga dhäwul nhan.............ŋunhuŋ gana’yin bayiŋuya gapuyu.
Ga wap nhan ga waripuŋurum gapu guḻun'ŋuru gapu wurkthuwan, ga mayaŋ'ŋuru ga barkaŋuru ga maŋutjiŋuru ga djurryurrŋuru, warrpam'thuwan yana dhawar'yuman.
Bayiku nhan ŋuthanam bathalayinan YOLYINAN dhika WAŊARRYINAN.
Banha nhan ŋoyanam ŋir'yunminam, ga dhulmum nhan yakan goyuwan ben nhana waŋarrnha bitjan ŋayi yakan runu-wuṯthuwan. Ga dhäwul wikarram djunama nhan ŋarruŋan dhulmun ḻuḻuḻuyuwan.
Nhanmam ŋarruŋan wäyinma ga waymim, ga gäyum waŋa'-waŋayinan ḻinygu gapuwun mäwu rangan.
Mariminan dhanal warwuyuwan gapuwu bala dhanal dhäruknha ganitjuman.
Ga nhanmam Biḻatiputjma waŋan bitjanan,
“Wäy yulparra, ŋalma Garkmannha biyarrmak-wuŋan, mä nhan ŋarru gitkitthun djunama nhanguru ŋarru gapum dhulmuŋurum djalkthunmin”.
Ga dhanalim nhangu bukmak yoran, bala dhanal ranganan Garkmangun.
Ga bukmakthu dhanal waŋga'-waŋganydhu birrka'-yuwan nhalpiyan dhanal nhana ŋarru biyarrmak wuŋan Garkmannha.
Ŋurruŋum nhangu wärraŋthu dhäwu yalkuwan rakaran, ga bayiwaḻim ga biyayay' nha nhanguḻi wakalŋin ga mayali'-wolan nhana, ga bayiwaḻim ga nyiknyiknha nhangura gumurrŋa marryuwan, ga………….dhäwul nhan ŋunhuŋ Garkman dhanaliŋguŋ gitkitthuwan.
Manymak ga banham dhanal dhuka-yarrkthuwan ga Gapu-raypinybuywun bäpiwu.
Ŋarru nhangum Garkmankum yakurrnha watjuwan. Bala nhangu gapu-raypinybuyma bäpi yuḻutjtjuwanan yuḻutj, yuḻutj, yuḻutj gaḻyuwan ŋarruŋan bala yanan ḻinygu ga galitjin Garkmanguḻi.
Bala nhan githi-githiyuwanan nhana GARKMANNHAM dhulmun yaŋara'yun nhangu-waywuru.
Ŋurruŋum nhan gaŋga gitgitthuwan.
Bala nhan ŋarruŋan marrmarryuwan dhulmun, marrmarryuwanan ŋarruŋan.
Bala nhan Garkmanma gitkitthuwanan.
Bala nhanguru gapum dhurrwaraŋurum ḻarrwaw' yuwanan ḻinygu nhan banha gitkitthuwanan warrpam'thuwanan yana ḻarrwaw' yuwanan
balaya guḻu'guḻunḻin, ga mayaŋḻin ga barkaḻin ga djurryurrḻin ga maŋutjiḻin malaŋuḻ.
Bala dhanalim mulmum, ga wäyinma ga gäyum malanynha goŋmiyinan.
Bala dhanalim waymim, ga wäyinma ga gäyum Wälŋayinan.
Ga nhanmam Garkmanma djunamaya yutjuwaḻa'yin.
Bala dhanal wäyindhum malaŋuyu ŋupanan nhanany retja'ḻin dhethuŋgan ga dhäwulnha dhanal biyapulma nhanany rumbal nhäŋal.
Dhäwulnha yanan dhäwulnha!
