Page 2.
Yothuy ŋäthin ŋäṉdiny ga bäpany, rirrikthurr ŋayi buthuru ga rathalay.
Page 4.
Bala ŋayi ŋäṉdi'mirriŋuny marrtjin raŋilila manhdhapidiwnha.
Page 6.
Ŋayiny yothuny ga bäpa'mirriŋuny marrtjin ḻarruŋal badarrwu man'tjarrwu.
Page 8.
Yurr dhukarrdja maṉda märraŋal wäkwakmirrilil. Ga ŋayiny yothuydja nhäŋal man'tjarrnha bala waŋanan bitjarr, "Bäpa, nhä dhuwandja man'tjarr?"
Page 11.
Ga ŋayi bäpa'mirriŋuydja lakaraŋal bitjarr, "Burukpili dhuwandja man'tjarr, ŋalparr'wu."
Page 12.
Bala maṉda marrtjinan raŋilila ga ŋayiny yothuydja nhäŋal man'tjarrnha bala waŋanan bitjarr, "Bäpa, nhä dhuwandja man'tjarr?"
Page 15.
Ga ŋayi bäpa'mirriŋuydja lakaraŋal bitjarr, "Malwan dhuwandja man'tjarr, mäpaṉgu."
Page 16.
Yarrupnha maṉda raŋi-ŋupara marrtjin, bala ŋayiny yothuydja nhäŋal man'tjarrnha ŋayi marrtjin raŋi-ŋupar ŋorran bala ŋayi yothuydja waŋanan bitjarr, "Bäpa, nhä dhuwandja man'tjarr?"
Page 19.
Ga ŋayi bäpa'mirriŋuydja lakaraŋal bitjarr, "Rowu dhuwandja man'tjarr, djetjiw."
Page 20.
Dhä-ŋur beŋuryiny maṉda nhäŋala djurr'yurrnha gapu, waṉdin gan. Bala yan maṉda dhunupan marrtjinany balayin dharpalil, ŋunhi wanha gan badarr dharpa dhärran.
Page 22.
Nhäŋal maṉda man'tjarrdja, bala ŋayiny bäpa'mirriŋuydja lakaraŋal
yothuwal bitjarr gam', "Gäthu, dhuwana badarrdja dharpa ga man'tjarr."
Page 25.
Bala maṉda marrtjin gulkthurra man'tjarrdja, bala yan roŋiyinan wäŋalila.
Page 27.
Gäman maṉda marrtjin badarrdja man'tjarr muḻkurryu wäŋalildja. Gurthany gan ŋawyurra ŋäṉdi'mirriŋuy dhaŋalkkuŋal, ga gurthaŋurdja gan nhäran manhdhapidi.
Page 29.
Bäpa'mirriŋuydja ga yothuydja dhunupan yan gapun diṯthurr rupa'lila, bala dhunupan yan buŋbuŋmaraŋala badarrdja man'tjarr gurthalila.
Page 30.
Dhawaṯmaraŋal maṉda gurthaŋurdja badarr rupa'mirr ga manhdhapidi, bala ŋulwitjkuŋala. Ga bäy ŋayi-i-i-i yal'yurr banikin badarrmirr, bala yothunhan maṉda ŋäṉdiy ga bäpay ḻupmaraŋala ŋuruŋiyiny badarryu.
Page 33.
Dhä-ŋur beŋuryiny ḻupmaranhaŋur yothuwal, maṉda ŋäṉdiy ga bäpay rarryurr weka manhdhapidi buthurulila yothuwal.
Page 34.
Bala ŋayi yothuny ḻayyurra, bala rälin ŋayi gan waṉdi-waṉdinany walŋathinan rerriŋurdja. Ga yakurrtja walalaŋ latjuny dhika bunan.
Page 36.
Ga wiripun walu djadaw'yurr, ŋayi yothuny gan buḻ'yurra bawalamirrikurra, bili walal warrpam'nha nhinanany gan ŋayaŋu-djulŋithinan.
