Waŋganydhu ḏaykun'thu walala yukurrana yolŋu walala nhina'nhinana wäŋaŋura, ga ŋayinydja waŋganydja dhäyka marrtjina bala ŋayi garr'yurrunana walalanha,
"Walala way, gul' ŋilimurru bala bitjan wäŋgama wiripuŋulili warraw'lili?"
"Gul' ŋilimurru," bitjarra walalanydja.
Bala walala marrtjinana.
Marrtjina walala bala-a, dharr nhäŋala djambaŋ gäyu ŋayi yukurrana gilyurruna dhärrana borummirri yurru djinawa'na rromaŋŋurana.
Bala walala marrtjina wapmaraŋalana borumdja, wiripu-guḻku'yu marrtjina wapmaraŋala gor' ga wiripu-guḻku'yu marrtjina gulkthurruna garrwarkurru gäyukurru.
Ga bay guŋnharryaŋala, ga biyapul walala marrtjina borumgu nhäŋa'-nhaŋala.
Ga ŋunhinydja walala biyapulnydja borumgu gundupuŋala ga ŋunhimalayina gäyulili ŋunhi ŋayi yukurrana ŋäṉuk gorruŋala ga nhäŋala walalanha ŋuliŋuruyi gäyuŋuru, wawuna yana walala gundupuŋala yana bini ŋunhi ŋamakuli wäŋa ŋula nhämiriw.
Ga dhiyaŋuŋga ḻinygu walala ŋarambiya djarryurruna borumgunydja ḻundukunharawu, bala ŋayinydja ŋulaŋurunydja ŋäṉuktja wapthurrunana walalaŋgala bala djarrwaṉkuŋalana walalanha.
Bäynha walala nhanukuŋu nhinana gundupuŋala dhä-ḻirrakaymirri,
"Wäy, wäy, wäy, gul' ŋilimurru marrtjina wäŋalilina ŋayi ŋilimurrunha marrtji dhuwala ŋänukthuna nyiwnyiwyun", bitjarrana.
Bala walala wäŋalilina gundupuŋala, gundupuŋalana yukurrana yanana ḻinygu ga wäŋaŋura.
Ga ŋunhalana wäŋaŋurana walala ŋoynydja ŋir'yunmina wandinyaranydja .
