Translated into the Warramiri Language by Marilyn Ganyinurru
Illustrations and Text © Barunga Literacy Production Centre.
This version printed at the Galiwin'ku Literacy Production Centre, 1998.
© Galiwin'ku L. P. C. 1998
Waŋganymi waluyu bukmak djanal ŋaḻapaḻmi yolŋu warra ŋaykan djunama maranhu-wolanhaḻ.
Ga yumurrku'nham djanaliŋguway djanal ganan ŋayiḻ.
Bala nhanmam waŋganyma ratha ḏirramu ŋarrin balan maniḻin ḻupḻupthundaḻ ŋarru ŋunhuŋun ya' milmitjpan.
Ŋarrin nhan bala nhan yakan ḻupḻupthuwanan ga djälwul nhan marŋgi, banya nhana yakan waŋayu nhäŋal bayiwaḻi bäyma yindiŋuru darpaŋuru. Djäwul wikarram ŋäkul nhan wäyinnhan rirrakaynha djanal ŋarrin gawaw'yunmin.
Bala nhan dhunupan walmanan ŋarkula'ŋurum djunama nhan yakan ḏitjuwanan ṉaŋ'thuwan balan ŋayiḻin ga rakaran waripu-guḻku'wuḻ yumurrku'wuḻ. Rakaranhamin djanal ḻinygun.
Ga munyakum nhan ŋarrin djanaliŋguḻ ŋirrimaḻ djunama nhan yakan yatjuwanan ṉapuŋgan' ŋayiŋan djanaliŋguḻ. Bala djanalim ŋarrin yumurrkum dhawayawaṯthuwanan ḻoḻuŋurum malanyŋuŋuru bala djanal yakan nhäŋalan nhana banyayan waŋa--nhan nhan yakan dhäyan ḻinygu nhana wikarra. Ŋarru djanal nhangu biyaṉiyinan gay, djunama djanal ŋarrin gulŋi'-gulŋiyanan ḻoḻuḻin ḻinygu djanal nhangu banya morrkawun biyaṉiyin.
Ḻinygu mäkiri wikarrawu ga, biṉiny wikarrawu ga rirra wikarra.
Ga ŋarrinam nhan yakan banyaya waŋam ḻiw'yuman djanaliŋgurumurru ḻoḻumurrum malanyŋumurru. Ḻinygu nhan yakan banya djälmiyin djawyundawu djanaliŋguru yumurrkuwu. Bala djanalim nhana ŋäṉḏi'miŋuyum ga bäpa'miŋuyum warrayu ŋupanan guḻayŋumiyun bayan nhan yakan biyaṉuŋu yuṯthuwan djanaliŋguŋ.
Ga yuṯthuwanam nhan banyaya waŋam dhunupan yanan balan maniḻin banya ŋalaŋa nhangu yakan mathirra dhäyan bala nhan guḻwuḻyuwanan.
Ga djäwulnha djanal yumurrku' biyapulma ŋarrin yumurrku' ḻupḻupthundaḻ banyambalaya maniḻ.
