(The Clucking Duck)
Dhäwu Dakitakiwuruy
Waŋganymi ḏaykun'thu waŋgany djukitjuki yakan nyinan mapu'ŋa malaŋa, gäḻkuḻan nhan yakan rathawu malaŋuwu dhanal ŋarru dhawaṯthun, bewaḻi mapu'ŋuru.
Bala beŋuruyam dhawaṯthuwan goŋ-waŋgany ga waŋgany bäytjinyara, yutjuwaḻa' djukitjuki.
Ŋarru waŋganyma banha wäyin waripu yana dhuwurr mulkuru, ga goŋ-waŋganyma djukitjuki rumbal warrpam' waŋganymurru.
Ga nhanmam banhayam waŋganyma wäyin ratha, ga dakitaki. Banha nhan ŋäṉḏi'miŋuyum djukitjukiyu nhäŋal nhanany dakitakiny, djunama nhan maḏakarritjinan nhangu.
Bala nhan ŋäṉḏi'miŋum djukitjuki waŋan bitjanan,
"Gatjuy, yuṯthuwan."
Ga nhanmam banhayam ratham dakitaki waŋan bitjanan.
"Giḻak," Bala nhan ŋoyanan mala-manapanan yumurrku'wuḻin djukitjukiwuḻi.
Ga waripuŋuyum ḏaykun'thu nhan ŋäṉḏi'miŋuyu djukitjukiyu nhanany nhäŋal, ga biyapul ŋaŋ'ŋaŋthuwan.
"Gatjuy yuṯthuwan," bitjan.
Ga nhanmam bitjanaya ḻinygu waŋan.
"Giḻak" bitjan.
Bala nhan malthuwanan yumurrkuwun djukitjukiwu malanyŋuwu.
Ga waŋganydhum ḏaykun'thu dhanal yumurrku' djukitjuki ḻaw'yuwan bala wakalŋinyaraḻi.
Bala dhanal ḻupḻupthuwanan gapuḻin, ḻinygu dhanal banha dhäwul marŋgi ḻupḻupthundawu.
Ga nhanmam ŋäṉḏi'miŋuyum djukitjukiyu nhäŋal dhanaliny ga waŋan bitjan,
"Way, yulparra nhalpiyan nhuma dhaŋu?"
Ga nhanmam banhayam yutjuwalam ḏakitaki marimin marŋgi ḻupḻupthundawu.
Ga bitjanaya ḻinygu nhan waŋan, "Giḻak!" bitjan. Bala nhan bayiŋuyam yutjuwaḻa'yum dakitakiyu guŋga'yuwanan yumurrku'nham djukitjukiny bewaḻi gapuŋurum.
Bala nhan ŋäṉḏi'miŋum djukitjuki bitjanan waŋan.
"Buku-djulŋi, yakan nhunu ŋarru ŋarruŋa. Djinalan bäyman nyiniya ŋanapiliŋguran," ŋurr'yumanan nhanany banhaya dakitakiny, Bala nhan banhaya dakitakim ratham waŋan bitjanan, "Giḻak!" Giḻak!" bitjan, ḻinygu nhan mariminan mä-ŋuwatjin.
