Moṉuktja gapu dhuwal ḻukanhamiriw.
Ŋunhiyiny gapu ŋuli ga bulyuna yan.
Yurr limurr dhu moṉukthuny gapuy bathan ŋarirri', miyapunu, ga dharrwa wiripu mala ŋatha ga warrakan'. Moṉuktja gapu limurr ŋuli yaka yan maḻŋ'maram raŋiŋur, wiripuny bawalamirriŋur.
Marakany limurr ŋuli malŋ'maram raŋanŋur dharpaŋur, yurr galki guḻu'guḻunmirriŋur.
Marrtji limurr ŋuli ga ŋunhi limurr ŋuli buḻuŋun nhäŋu raŋanŋur dharpaŋur bala limurr ŋuli djatthurra ŋunhiyi buḻuŋundja ḏakul'yun, bala ŋuli gapuny ḻarryuna beŋur dharpaŋurnydja yurrdhäkay-murrkthuna.
Guḻun'ŋurnydja nhe ŋuli maḻŋ'maraŋ raypiny, dhäkay-murrkthuna, ga moṉuk gapu.
Wiripuny ŋunhi manymak nyaŋ'thunaraw ga wiripuny yakan. Rarranhdharrmirriynydja guḻu'-guḻundja ŋuli baṉḏanydhirra. Ga gapuny ŋuli ga dhärra Rarranhdharrmirriy yan.
Warraga ḻup'maranhamirra ŋunhiny gapu.
Djurryurr'nydja gapu limurr ŋuli maḻŋ'maraŋ raŋiŋur, yurr waltjaṉmirriy. Bala ŋuli gapuny ga ŋunhi waṉḏirr djurryurr'nydja raŋikurra.
Rarranhdharrmirriynydja ŋayi ŋuli djurryurr'nydja gapu baṉḏanydhirra.
Maŋutjiny gapuŋuli ga dhärra bitjana bili baṉḏanydhinyamiriwnha, Rarranhdharrmirriynydja ŋayi ŋuli ŋunhi maŋutjiny gapu bäyŋun baṉḏanydhirr.
Yolŋuynydja walal ŋuli marrtji ŋunhiyin gapu birrka'yun.
Dhuwandja maŋutji gapu Dhuḏupuŋur.
Mayaŋ'ŋurnydja gapu limurr ŋuli maḻŋ'maram raypiny ga wiripuny moṉuknha yan.
Dhuwandja gapu moṉuk. Wiripuny mayaŋ'ŋur limurr ŋuli maḻŋ'maram raypinynha gapu. Dhuwandja mani ŋunhal Dhuḏupuŋur.
Riyalany gapu dhu ga waṉḏirr raypinynha dhika.
Ŋunhiyiny yaka moṉuk wo dhäkay-murrkthuna gapu, ŋunhiyiny raypinynha yan. Dhuwandja riyala ŋunhal Djoniŋur.
Wiripuny riyala gapu ŋuli ga waṉḏirr waltjaṉpuy ga rarranhdharrmirriynydja ŋunhiyiny gapu ŋuli baṉḏanydhirra. Dhuwandja gapu riyala ŋunhal Djoniŋur. Waltjaṉmirriy ŋuli ga dhuwandja riyala waṉḏirr.
Wiripuny riyala gapu nhakun dhuwal Guḻmanŋur. Dhuwandja gapu ŋuli ga bulyuna yan dhuŋgarra-ŋupana baṉḏanydhinyamiriwnha.
