Biḻpiḻŋaniŋpuy Dhäwu

The Jacksonia Tree Story

Dhuwandja biḻpiḻŋaniŋdja mirritjin milŋiny'puy yan, yurr yumurrkuw balanyaraw gaḻ'yunamirriw nhinanhamirriw ga dhärra'-dhärranhamirriw djamarrkuḻiw'. Yaka dhuwal mirritjin ŋaḻapaḻmirriwnydja.

Ŋurruŋuny napurr ŋuli marrtji ḏiltjilil ga ḻarrumany napurr ŋuli dharpaw yäkuw biḻpiḻŋaniŋgu. Ga balanya nhanŋu man'tjarrnydja.

Ŋunhi napurr maḻŋ'maramany bala ŋayiny Djuluŋaynydja gulkthuna.

Gulkthundja ŋunhi ŋuli ga balanyan ŋunhi watharrnha wiriny'tjundja ŋuli ŋanya.

Ŋurruŋuny napurr ŋuli marrtj bala ḏiltjilil, bala napurr nhäman rarralan. Bala ŋayi Djuluŋaynydja märraman.

Märramany ŋayi rarralany bala ŋayi ga wiriny'tjuna. Bala ŋayi rulwaŋdhuna djorra'lila.

Bala ŋayi yarrwa'yuna biḻpiḻŋaniŋdja djorra'lila.

Dhuwandja gapu nhära ga gorrmur' biḻpiḻŋaniŋgu. Ga guṉḏany rarralany ga djinagan ŋorra rupa'ŋura. Ga ŋuriŋiyi rarralay guṉḏay ŋuli ŋunhiyi dhäkay manymakkum, märr dhu ŋoy yothuny ḏälkum. Märr dhu ŋunhiyi yothu yakan buluny rirrikthun milŋiny'thu.

Ga beŋuryiny ŋayi ga wapmaraman ŋunhi biḻpiḻŋanaŋdja balan gorrmur'lila gapulil.

Ga dhuwana gapu ga buŋbuŋdhuna. Ga guṉḏany ga ŋorra ŋunhi rupa'ŋura djinagan.

Beŋuryiny limurr ŋuli rulwaŋdhurr rupa' biḻpiḻŋaniŋmirr balan gurthalila, ga bäynha ŋuli ga nhära gurthaŋur.

Ŋunhi ŋuli buŋbuŋdhundja bala märraman ŋunhiyi rupa' biḻpiḻŋaniŋmirr, yurr wiriny'tjunawuy. Bala rulwaŋdhuna ŋulwitjkuman ŋuli.

Ga bäy ŋuli biḻpiḻŋaniŋ rupa'mirr ŋulwitjthirr bala ŋuli gurrupana yothunhany yan. Gurrupanydja ŋuli dhuwal biḻpiḻŋaniŋdja ŋunhi ŋuli yothuny rirrikthun milŋiny'thuny.

Bala limurr ŋuli ŋuruŋiyi wiriny'tjunawuyyu biḻpiḻŋaniŋ yothunhany biḏi'yurrnha rumbalnha. Bala ŋuli yothuny manymakthirra.

angle-double-left