GURRUḺANGALAŊUWUY DHÄWU
Dhuwandja dhäwu baman'puy ŋurruṉaŋgalpuy, ŋunhi Gurruḻan gan nhinan dhiyal wäŋaŋur. Nhinan ŋayi, bala ŋayi marrtjinan, ga märraŋalnha dharpa biḻparr, bala djarrktjarrk-thurrnha ŋunhiyi biḻparrny't ja. Ga bulu ŋayi ḏuwaṯthurr bala djaḻumbuw, bala ŋayi gulkthurra ŋuriŋi Gurruḻandhu djaḻumbuny, bala ŋayi batharnha.
Ga ŋayiny marrtjin beŋur Buṉḏawiliŋur Gämuny. Bala ŋayiny nhäŋalnha ŋanya Gurruḻandhuny, bala ŋayi ŋurrkaŋalnha biḻparrny'tja, bala ŋunhi wäŋany dhuwal yindithinan guḻundja.
Ga ŋäthilnydja gan dhuwal wäŋa dhärran bäyŋu guḻun, ga bäyŋu gapu ganha yindi bäninya; nyumukuṉiny yän dhärran maŋutji, yurr Gurruḻan-guŋ. Ga ŋunhi ŋayi ŋurrkaŋalnydja biḻparrny'tja bala marrtjinan ganarrthamha ŋunhi dhuwal wäŋany. Yurr rrambaŋi maṉḏa ŋunhi marrtjinany; ŋayiny Gämuny garrwarkurr ga ŋayiny Gurruḻandja munathakurr marrtjinan. Bala ŋayiny gan ŋunhi marrtjinany Dhalmurralilnha, ŋayiny gan ŋunhi ŋäthil nhinan Girkirwa. Ga ŋayiny Gämuny marrtjin balan Burrum'lilnha.
Bilin dhuwal dhäwuny Gurruḻangalaŋuwuy baman'puy dhawar'yurra.
GURINIWUY DHÄWU
Guriniy djaw'yurr miyalk Gudhurruny, bala ŋayi Gurininy marrtjinan ḏakawaw'nha. Ga walalnydja gan nhinan Gudhurruwnydja bäpa’mirriŋu ga ŋäṉḏi'mirriŋu, ŋuriki miyalkkuny bäpa'mirriŋu ga ŋäṉḏi'mirriŋu. Bala ŋayiny marrtjinan bumarnha Guriniynydja ḏakawany, bala ŋayi gurthan baṯthurr ŋuriki ḏakawaw bathanaraw, bala ŋayi batharnha gan ḏakawany. Ga beŋuruyiny ŋayi marrtjinan, bala ŋayi bunanan walalaŋ bäpa’mirriŋuw ga ŋäṉḏi’mirriŋuw, bala ŋayi ḻakaraŋalnha walalaŋ ḏakawany. Ga ŋayiny maḻamarryuny yapa’mirriŋuy Gudhurruy yänguŋal yukuyuku'mirriŋuny nhanŋuwuy ŋayi. Ga Gurininy waŋan bitjarr, "Yaka, ŋayipi dhu marrtji yapa'mirriŋu nhuŋu," bitjarr. Bala ŋayipin marrtjin maḻamarrnha yapa'mirriŋu ŋuriki yutjuwaḻaw yapa'mirriŋuw. Ga ŋayiny Gurininy ŋoy-ŋamathinan, bala ŋayi gurrupar wiṉ'kuŋuy nhanŋu ḏakawany, ga dhunupa'ŋuynydja ŋayi waṉan ŋanya ŋayathaŋal. Bala ŋayi djaw'yurrnha
Ŋanya märramban Gurininynydja dhiyal.
Ga dhawar'yurrnha Guriniwuy dhäwu.
DHUWANDJA DHÄWU MOKUYPUY DHARPUNHAWUY
Waŋganymirr yolŋu gan marrtjin baman' birr. Marrtjinany ŋayi ŋunhi, bala ŋayi wäyinnha bumar ŋuriŋi yolŋuy. Bala ŋayi gurthan baṯthurr wäyingu, bala ŋayi batharnha wäyindja nhanŋuwuy ŋayi, yurr walu gärrinyaray. Bala ŋayi ḻukanan ŋunhi wäyindja. Ḻukanany ŋayi gan, bala ŋayi ŋal’yurra dharpalilnha. Ŋunhiliny ŋayi gan ŋorranany makaṉbiŋurnha garrwar dharpaŋur munhawuny. Bala ŋayi ŋäkul, ŋayi marrtjin dirrŋgu dirrŋgu. Bitjarr waŋan ŋayi marrtjin ŋunhiny mokuynydja bitjarr gam', "Yolthu ŋarraku wäŋany gungaŋal? Yolthu ŋarraku wäŋany gungaŋal?" ga bitjarr ŋayi marrtjin waŋanany ŋunhiyiny mokuynydja. Bala ŋayi ŋunhi yolŋuny ŋamathanhaminan garrwarnydja. Bala ŋayi garan märraŋal ŋuriŋiny yolŋuy, bala ŋayi yarrarra’maraŋal. Ga ŋayiny marrtjin ŋal'yurra ŋunhi mokuynydja, guwatjmar ŋanya marrtjin bala garrwarlil. Bala ŋayiny ŋunhi yolŋuynydja
ŋanya dharpuŋalnha, bala ŋayi rakunydhinan ŋunhi mokuynydja.
Bilin dhuwal dhäwuny.
MURAYANAWALAŊUWUY DHUWANDJA DHÄWU
Murayanany gan nhinan; ŋayi gan yiḏaki djäma manymak. Ŋunhi ŋayi gan djämany, bala ŋayi ḏopthurra ŋoy birrka'yurr. Yän yätjkurr warray, bala ŋayi buthuru-bitjurrnha yän, walal ŋunhal ḏopthurr, bala ŋayi Murayanaynydja ŋäkulnha Wubulkarrawuŋun. Ŋunhi ŋayi ŋäkulnydja bala ŋayi marrtjinan rirrakay ŋuparnha, bala ŋayi waṉḏinan. Ga gandarrŋurnydja ŋayi dhärran buthuru-bitjurr; yän ŋayi ŋäkulnha ŋamathaŋalnha, bala ŋayi djuḏupthurrnha marrtjin walalaŋgal. Ŋunhi ŋayi nhäŋalnydja yiḏakiny, bala ŋayi yiŋarra'yurrnha. Bala yarrupthurr ŋayi wäŋalilnha, guwatjmarnha walalany. Bala ŋayiny nhäŋalnha walalany, bala Wubulkarrany mala nhanŋu märr-ŋamathinan mirithinan, ga ŋayi märr-ŋamathindhi walalaŋ bitjarrdhi bili. Ga Wubulkarrany waŋan Murayanaw bitjarr, "Nhaku nhe ga marrtjiny, gutharra?"
Ga Murayanany waŋan bitjarr, "Yän ŋarra ga marrtji märiwal. Mak limurr giritjirrnha märiwal buŋgulnha." Bala walal giritjinan buŋgulnha, ga ŋayiny Murayanany waŋganymirr giritjin walalaŋgal. Bala ŋayi waṉḏinan walalaŋgalaŋuŋur märr barrkuwal. Ga walal nhanŋu ḏopthurr, bala ŋayiny waṉḏin bala warraw'lilnha. Ga bulu nhanŋu walal ḏopthurr, bala ŋayiny märraŋalnha yiḏakiny, bala djaw'yurrnha, bala walal warguguyurrnha mirithinan. Wubulkarrany mala.
Bala ŋayiny Murayanany waṉḏinan roŋiyinan rälin Mandjalilnha. Waṉḏinany ŋayi, bala gandarrŋurnydja ŋayi ḏopthurra, walalnydja nhanŋu yiŋgathinan. Beŋur ŋayi roŋiyinany, bala ŋayi ḏopthurr bulu, bala walalnydja ŋäkul nhanukalnydja yolŋuy, bala yiŋgathinan nhanŋu. Ga waŋganymirrnha walal giritjinany, bala ŋayiny Murayanany marrtjin balan
Guḻkuḻalilnha. Ga marrtjinany ŋayi, ga gandarrŋur ŋayi ḏopthurr, bala waṉḏinan. Ga ŋunhi ŋayi waṉḏinany, ga gandarrŋurnydja ŋayi gukuw dhupuŋal, yurr bäyŋu. Bala ŋayi waṉḏinan, bala wäŋan nhäŋal. Ga ŋunhayin ŋayi ga nhinany, ga Guḻkuḻan wäŋaŋurnha nhanukiyingal. Dhiyalnydja ga dhäwu dhawar’yunna Murayanaw. Ga ŋathany walal ŋunhi djalkthurrnha yukuwany, yurr dhuyu ŋunhi ŋathany.
